Ikastolak

Udalekuak Ikastola Elkartea

Zirimola Ikastolen Aisialdi Taldearen udalekuak(Eskaintza)

Urtero bezala aurten ere Zirimola Ikastolen Aisialdi Taldetik udalekuak antolatuko ditugu.

Gure urteetako esperientzia baliatuz, uda honetan haur eta gazteek behar eta merezi duten programazioa landu dugu, aurtengo egoerak eskatzen dituen segurtasun neurriak bermatuta.

Euskal Herri osora irekitzen diren udalekuak dira hemen aurkeztutakoak. Eskaintza askotarikoa izateko asmoz, udaleku eta egonaldi batzuk egokitu ditugu, baita berriak sortu ere. Egonaldi bakoitzak eskaintzen dituen berezitasunez gain, denek dute helburu bera: Euskal Herriko haur eta gazteen topagune izatea. Naturaz gozatzeko, lagun berriak egiteko, Euskal Herriko txokoak ezagutzeko eta euskaraz gozatzeko plan aproposa dela iruditzen zaigu.

 

Udalekuen informazio gehiago HEMEN aurkituko duzue, eta baita mezu honi atxikita doan eskuorrian ere.

Izen ematea Apirilaren 12an irekiko da eta Maiatzaren 17an itxiko. Matrikulazioak online egingo dira zirimola.eus web orriaren bitartez.

Haur eta gazteek merezi dutelako, udan ikusiko dugu elkar!

 

Zergaitik ikastolak?

IRITZI ARTIKULUA. ZERGATIK IKASTOLAK?

Matrikulazio kanpaina betean gaude, eta euskal familia asko beraien seme-alabak matrikulatzeko aukerak aztertzen ari zarete. Gizartearen nahi eta beharrekin batera, gurasoenek ere aurrera egiten dute, eta guraso belaunaldi bakoitzak, bere hautua egiten duenean, aurrekoekiko elementu berriak hartzen ditu kontuan: gure herriaren, garaien… joanak eta etorriak islatzen dira matrikulazio kanpainan gurasoek hartu behar duten erabaki handi eta garrantzitsu horretan. Ikastoletan, ondo jabetuta gaude errealitate berri horietaz, eta itxaropenez begiratzen diogu guraso gazteek beren seme-alaben hezkuntzan gero eta gehiago parte hartzeko duten nahiari.

Ikus ditzagun, bada, gure proiektuak guraso horiei eskaintzen dizkien argudio nagusiak ikastolen aldeko hautua egin dezaten. Familia bakoitzak bereak eta askotarikoak izango baditu ere, hauek azpimarratu nahiko genituzke:

1.- Ikastoletan hezkuntza prozesuan erabakiak hartzeko momentuan inplikatutako talde guztiek (familiak, langileak eta ikasleak) parte hartzen dute. Ikastola bakoitzak hartzen duen forma juridikoaz gain (normalean kooperatiba), ikastolen oinarrizko filosofia da hezkuntza-komunitatea osatzen duten gizatalde guztien artean, era demokratikoan, hartzea bere funtzionamendurako funtsezko erabakiak. Horrek familiak hezkuntza-prozesuan gehiago inplikatzea dakar, eta  uste dugu ezinbestekoa dela prozesu hori eraginkorra izatea, gure seme-alaben hezkuntza gure esku dagoela uste baitugu.

2.- Ikastoletan euskara da ikaskuntza prozesua bideratzeko ezinbesteko tresna, eta ez hori bakarrik, guretzat euskaraz bizitzea helburu bat da; ikastoletan ez dugu ikasketa eta hezkuntza prozesu hori euskara eta euskal kultura gabe ulertzen, gure funtzionamenduaren funtsezko elementuak dira biak, eta euskararen ezagutza eta erabilera emaitzek hori horrela dela erakusten dute. Lortutako emaitzekin konformatzen ez bagara ere, argi dago ikastolak direla hezkuntza sistema osoan euskal hiztun konpetenteenak hezten dituen sarea.

3.- Ikastolak bide egile gara berrikuntza pedagogikoan, aitzindari papera erantzukizunez betez. Hezkuntza proiektu sendo eta propioak dituzte ikastola guztiek, ikasleen irteera profilari begira lan egiten dugu. Konpetentzien garapenean fokua jarriz, ezagutzak barneratzea bermatuz eta espazioak ikaskuntza prozesuaren zerbitzura egon daitezen diseinatuz. Egungo euskal hezkuntza-sistema ezin da ulertu ikastolek historikoki ikuspegi pedagogikotik egin dioten eta egiten jarraitzen duten ekarpenik gabe: Txanela, Urtxintxa, EKI, Kimu, Kuku, Euskaraz Bizi, Aisialdia …  bezalako proiektuak, horrenbeste aipatzen den Euskal Curriculumean oinarritutako proiektuak, garatu eta sistema osoaren zerbitzura jartzen ditugu. Euskal dimentsioaren lanketa sistematiko eta sekuentziatua egiteko ikasmaterialak sortu ditugu, puntako produktu nazionalak garatuz.

4.- Ikastoletan elkartasuna oinarrizko balioa da. Batetik, ikastola bakoitzaren barruan: administrazioaren finantzaketarik ezean, kobratzera behartuta dauden kuotak ordaindu ezin dituzten familiei laguntzeko beken sistemak bideratuz; bestetik, gainontzeko ikastolekin: Elkartasun-Kutxaren bidez, urtero hezkuntza proiektua aurrera eramateko zailtasun ekonomikoak dituzten ikastolei laguntza ematen zaie (Ipar Euskal Herriko eta Nafarroako ikastolei batez ere) ikastolen hezkuntza komunitatea osatzen duten familia guztiek urtero 15 euroko ekarpena eginez.
5.-Ikastolena ez da bere baitan hasi eta bukatzen den egitasmoa. Euskal Herriaren izaera islatu eta hezkuntzaren bidez eraldatzen duen eragile bizia gara, beste gizarte-mugimendu batzuekin batera, bereziki euskararen, euskal kulturaren eta kooperatibismoaren mundukoekin elkarlanean jarduten dugu. Aktiboki parte hartzen dugu gizarte-erakundeetan (Kontseilua, Euskal Unibertsitateak, Gaindegia…), euskararen garapena sustatzen duten ekimenetan (Puntueus, Errigora, Bizipoza, Euskararen marka, Euskaraldia…) eta akordio estrategikoak ditugu arlo horretan lan egiten duten erakunde ia guztiekin (Eusko Ikaskuntza, Euskaltzaindia, AEK, Bertsozaleen Elkartea, Elkar, Irrien Lagunak, Wikilariak, …). Herri honekin, euskararekin eta euskal kulturarekin dugun konpromisoa gure irakaskuntza-proiektutik askoz harago doa, gure izatearen oinarrizko osagaia da. Guretzat, garrantzitsuena, egiten ditugun proposamenak, onura komun eta publikokoak direla da: Ikastolen proiektuarekin, gizarte osoak irabazten du.

6. Ikastolak herrigintzatik sortu diren heinean, egun ere oinarri duten auzolana, komunitatearen parte izateko pizgarri da; parte hartzeko guneak, erabakimena, eragiteko aukera, klase orduez gaindiko eskaintza, herriarekiko eta herritarrekiko ekarpena... proiektuaren parte aktibo izateko aukera eskaintzen dute Ikastolek, auzolanean, kolektiboan eragiteko ekimenak planteatuz. Honek, proiektua norberarena ere sentiaraztea dakar, baita harremanak garatzeko aukera berriak edota estuak ere . Heziketa eremutik askoz ere harago doan proiektua da: Ikastolak herri egileak dira.

Euskal Herri osoarentzako hezkuntza sistema propio baten alde eta euskal gizarte euskaldun, berdinzale eta iraunkor baten alde lanean jarraituko dugu, orain arte bezala. Eta hori egingo dugu, ziurrenik, erosoena eta errazena ez den bidetik: herrigintzatik, hain zuzen ere. Elkarlan kolektibotik, erantzukidetasunetik. Irmoki sinesten baitugu horretan: herritarrok, gurasook, ikasleok, langileok eta eragileok ditugun erronkei eta beharrei era antolatuan erantzuteko dugun gaitasunean.

Matrikulazioa ikastolak

Elkartasun kanpaina

Aurtengo ikastolen jaiak antolatzen aritu diren ikastolei laguntzeko elkartasun kanpaina ere abiatu genuen ostiralean

 

Iragan ostiralean ospatu genuen Ikastolak Herriari ekitaldiarekin lortu dugu hein batean aurtengo ikastolen jaien zikloari zapore gozo batez amaiera ematea. Ekitaldia ETB1n emango dute larunbat honetan, gaueko hamarretan. 

Argitxoen jolasak salgai!

Argitxoren jolasak. Piztu jolasaren zirrara!

     Jolastea da ikasteko modurik dibertigarriena. Jolastuz ikasten dugu, besteekin harremanetan jartzen gara, barre egiten dugu, burua astintzen, gorputza mugitzen. Irabaztea ez delako helburua, jolas egiten dugu ongi pasatzen dugulako, zoriontsu egiten gaituelako, kitzikatzen gaituelako, zirrara eragiten digulako. Familian, lagunartean, lagunen lagunekin… elkarrekin jolasteko bost joko dakarzkigu aurten Argitxok: 

     Argitxo eta gure gorputza, Argitxoren lehen hitzakNor da nor? Argitxorekin jolaseanArgitxo Euskal Herrian eta Urkatua.

    Piztu jolasaren zirrara!

Errigora 2019. Eskaera.

   

Abian da 2019ko ERRIGORA kanpaina euskara bultzatzeko Nafarroako eremu "erdaldunean", bertako baratzetako produktuak Euskal Herrian zabaltzen lagunduz bidebatez.

ESKAINTZA    TXOSTENA

Eskaera, ohi bezela, Haztegi Ikastolako idazkaritzan egin daiteke.

GOGORATU AZAROAREN 20a DELA ESKAERA EGITEKO AZKEN EGUNA

Herri Urrats 2019

Data: 
Igandea, 2019, Maiatza 12 - 09:00-tik Astelehena, 2019, Maiatza 13 - 17:55-ra

Maiatzaren 12an, igandean, Iparraldeko ikastolaren jai handia izango da Senpereko lakuaren alboan.

Udako Aisialdi eskaintza 2019

 

Ikastolen Elkartearen eskaintza udako aisialdirako

ESKUORRIA    CIRCULAR

IZEN-EMATEA    MATRÍCULA

https://www.aisialdia.eus/

 

 

 

 

Kilometroak 2018. Urretxu-Zumarraga

Data: 
Igandea, 2018, Urria 7 - 09:00-tik Astelehena, 2018, Urria 8 - 19:55-ra

Urriaren 7an Gipuzkoako ikastolen jai handia(KILOMETROAK) ospatuko da Urretxu-Zumarragan.

Herri Urrats 2018

Data: 
Igandea, 2018, Maiatza 13 - 00:00-tik 23:55-ra

Maiatzaren 13an, igandean, Iparraldeko ikastolaren jai handia izango da Senpereko lakuaren alboan.

Orriak

RSS - Ikastolak-era harpidetu