Manipulatuz, pentsamendua eraldatu eta ekinez ikasi

Lehen Hezkuntza

Lehen Hezkuntza Haztegi ikastolan


Etapa honetan,  Haur Hezkuntzan hasitako bideari jarraipena emango diogu. Sei urte irauten du, 6-12 bitartean. Etapa erabakigarria da pertsonaren heziketan. Izan ere, etapa honetan funtsezko trebetasunak garatzeko oinarriak bermatzen dira, balioak bereganatuz eta jarrerak garatuz. 

Ezaugarriak:

  • Mugimendu eta jolasaren beharra.
  • Autonomiaren garrantzia.
  • Frustraziorako gaitasuna.
  • Emozioen kudeaketa.
  • Arauak eta mugak → autoerregulazioa
  • Elkarreragina; aniztasunari erantzuteko aukera.

Erabiliko dugun metodologia eredu hezkidetzaile global batean oinarritzen da; beraz, pertsona ardatz gisa harturik, bakoitzaren hazkuntza integrala bultzatzea eta talde kooperatiboen garrantzia sustatzea ditu helburu..

Gure proiektua pertsona bakoitzaren baliabideetatik/trebezietatik abiatzen da. Irakaslea bidelagun izanik, ikasleak bere gaitasun harmoniko osoa lortzen du bere bost esparruetan: komunikatzen ikasi, pentsatzen eta ikasten ikasi, egiten eta ekiten ikasi, elkarrekin bizitzen ikasi eta norbera izaten ikasi. 

Ikerketa eta hausnarketa lanak azalpenak baino garrantzitsuagoak dira, etapako maila bakoitzera egokituz. Honekin bat, elkarrekin lan egitea ezinbestekoa izango da, elkarren artean proiektuak garatuz; ikasketa kooperatiboak, beraz, protagonismo handia izango du gure egunerokoan.

Gure egunerokoa

Lehen Hezkuntza sei ikasturte dituen etapa da.

LH1-2-3: Metodologia aktiboari eta esperimentalari indarra emanez eta materiala manipulatuz, hainbat proiektu gauzatzen ditugu. Modu autonomoan lan egiten dugu, autorregulazioa bultzatuz eta beti ere ikasle bakoitzaren erritmoa errespetatuz.

LH4-5-6: EKI proiektua aurrera eramaten dugu. Konpetentzietan oinarritutako diziplinarteko proiektua da; eduki baliabideak eskuratu, mobilizatu eta ikasteaz gain hauek egoera errealetara transferitzea eskatzen duen proiektua.

Ordutegia

09:00etik 12:30era goizean.

14:30etik 16:30era arratsaldean.

1. EKI Lehen Hezkuntza

Image

EKI proiektua ikastola guztion artean diseinatu eta eraikitako proiektua da. Euskal Curriculumeko Konpetentzietan oinarrituta dago eta Integrazioaren pedagogiaz baliatzen da.

Ezaugarriak

  • 2013-2014 ikasturtetik aurrera indarrean dagoen proiektua da.
  • Integrazioaren pedagogia ardatz hartuta, proiektuka antolatuta dago eta diziplinen arteko uztarketa ematen da. Hein horretan, gai beraren baitan, arlo bakoitzeko helburuak bermatzen dira.
  • Bost konpetentzietan oinarritzen da eta arreta berezia eskaintzen dio konpetentzia digitalari.
  • EKIGUNEA. EKI proiektuaren webgunea da, euskarri digitalak biltzen dituen txokoa: audioak, bideoak, animazioak, irudiak, jarduerak eta informazio-testuak.
  • BLINK. Liburu digitala erabiltzen da hainbat jarduera egiteko.
  • GOOGLE APLIKAZIOAK. Gmail, Drive, Calendar, Meet eta Classroom erabiltzen dira.

Ezaugarri bereizgarriak

  • Euskara eta euskal kultura ardatz dituen proiektua da.
  • IKTak arlo guztietan integratzen ditu.
  • Ikaslea bere ikaskuntza prozesuaren protagonista da eta irakaslea prozesu horren bidelaguna eta gidaria.
  • Ikaslearen garapen integrala du helburu, bere bizitzan konpetentea izateko. Horretarako, barneratutako ezagutzez baliatuko da.

Antolaketa

Arlo bakoitzean hiru fase bereizten dira:

  1. Hasiera fasea: ikasleen aurrezagutzak aktibatzen dira motibazioa piztuta.
  2. Garapen fasea: edukien bidez, ezagutza berriak ikertzeko aukera izaten dute ikasleek. Ikerketan eta esperimentazioan oinarritzen den heinean, ikasleek hainbat gaitasun garatzeko aukera dute.
  3. Amaiera fasea: unitatean zehar landu diren edukiez baliatuta, ikasleek proiektu bat eramaten dute aurrera, ordura arte barneratutako guztiarekin.

Ebaluazioa

  • Behaketan oinarritzen da.
  • Ikasle bakoitzaren ikaskuntza prozesuaren garapena aztertzen da, hasiera fasetik amaiera faseraino.

2. INNOVAMAT (LH 1-2-3)

Image

Innovamat, ikaskuntza manipulatiboa eta konpetentziala izateaz gain, ikasleentzat esanguratsua den matematikako proposamen bat da.


Kontzeptu matematikoak aurkezten ditu, hala nola, zenbaketa, geometria, logika edo estatistika. Haurrak pixkanaka eta manipulatuz hauek deskubritzen doaz, kontzeptuak ulertuz, finkatuz eta aplikatuz.

Ezagutzak hiru ardatzen inguruan antolatzen ditu:

  • Zenbakien laborategia
  • Abenturak
  • Plataforma (APP)

Proposamenak  ikasteko eta bere ahalmen osoa garatzeko gonbita egiten dio ikasleari eta hori lortzeko, funtsezkoa izango da:

  • Edukiak eta trebetasun matematikoak irizpide didaktikoen bidez aurkeztea.
  • Haurren ikaskuntza-erritmoa errespetatzea.

  • Matematika-prozesuei balioa ematea: problemak ebaztea, arrazoitzea, konektatzea, komunikatzea eta irudikatzea. Edukiak ahaztu gabe.

3. PIKTOIDAZKETA (LH1-2)

Image

PiktoIdazketa ikasteko metodo bat da, sormena eta irudia Lehen Hezkuntza osoan zeharkako eragina duen arlo batean txertatzen dituena: hizkuntzan, alegia. Ikasbide gehienak taldeak sortzen edo ekoizten duenetik abiatzen dira.

PiktoIdazketaren bitartez, haurrak irakurle, idazle eta komunikatzaile aditu izateko ezinbestekoak diren estrategietan trebatzen dira. Hori, betiere, askotariko hizkuntzak lotuz: ikusmintzaira, ahozko hizkuntza, gorputz-hizkuntza eta hizkuntza idatzia.

PiktoIdazketaren ardatza ikasleek irudi aberatsak irakurtzeko eta sortzeko duten gaitasuna piztea eta lantzea da. 

PLATAFORMA DIGITALAK ikasleei ikaskuntza-ibilbide pertsonalizatuak antolatzen dizkie. Izan ere, ikasleek ordenagailuan edo tabletan jolas batzuk egiten dituzte, eta programak zein maila duten zehazten du, giltzarri diren hizkuntza-gaitasun hauek aintzat hartuta: hiztegia, ortografia, morfologia, sintaxia eta irakurmena.

Hala, behin maila zehaztuta, programa ikaskuntza-ibilbidea egokitzen joaten da: zailtasunen bat duten arloetan material errazagoa eskaintzen die eta, aldi berean, nabarmentzen diren abilezietan material aberats eta konplexuagoa. 

Plataforma digitalarekin ikasgelan zein etxean lan egin dezakete. Irakasleak erabakitzen du ikasgelan zein ariketa egin eta ikasleei bakarka egiteko zein ariketa egokitu.