Errealitatera gerturatuz, heldutasunerako bidea eraikiz

Euskara ardatz duelarik EKI proiektua ikastola guztion artean diseinatutako proiektua da. Euskal Curriculumeko Konpetentzietan oinarrituta dago eta Integrazioaren pedagogiaz baliatzen da.

Ezaugarriak

• 2013/2014 ikasturtetik aurrera indarrean dagoen proiektua da.
• Gaztea bere osotasunean hartzen duen proiektua da.
• Edozein bizitza-egoeratan konpetentea izatea lortu behar du ikasleak: pentsatzen eta ikasten, komunikatzen, elkarrekin bizitzen, norbera izaten eta egiten eta ekiten jakin behar du.
• Konpetente izateko ikasitako edukiak antzeko ezaugarriak dituzten beste egoera batzuetara transferitzen ditu, bakarka nahiz talde-lanean, beharrezkoak diren arloetako ezagutzak aplikatuz.
• Konpetentzia digitala lantzea ahalbidetzen du.
• Eleaniztasuna bultzatzen du:  hizkuntzen (euskara, gaztelania, ingelesa eta frantsesa) planteamendu integratua egiten du.
• EKIGUNEA. EKI proiektuaren webgunea, euskarri digitalak biltzen dituen txokoa: audioak, bideoak, animazioak, irudiak, jarduera osagarriak, konpetentzia digitala lantzeko fitxak eta informazio-testuak.
• Hiru fase bereizten dira proiektuan: hasiera fasea (ikaslearen aurrezagutzak aktibatzea zein ezagutzea eta motibazioa piztean oinarritzen da), garapen fasea (edukien bidez, ezagutza berriak ikertzeko aukera eskaintzen du. Ikerketan eta esperimentazioan oinarritzen den heinean, ikasleak hainbat gaitasun garatzeko aukera izaten du) eta amaiera fasea (unitatean zehar landu diren edukiez baliatuta, proiektu bat aurrera eramaten du, ordura arte barneratutako guztiarekin).
• Konpetentziaren ebaluazioa: pertinentzia (ikasleak egoeraren eskakizuna ulertzen  eta planifikatzen du); baliabideen erabilera (planifikatutakoa gauzatzen du) eta koherentzia (emaitzaren onargarritasuna baloratzen du).

EKI digitala

Gaur egungo gizarte digitalizatuari erantzuna eman nahian, EKI proiektuak ikasmaterial digitalak eskaintzen ditu eta hauek gero eta presentzia handiagoa dute ikaste-prozesuan. Hala, Bigarren Hezkuntzako zenbait arlotan liburu digitalak erabiltzen dira eta horretarako ikasle bakoitzak bere ordenagailua du. Ondorengo arlo eta mailetan erabiltzen da EKI digitala Haztegi Ikastolan:

• DBH 1 eta 2 mailetan Gaztelania arloan;
• DBH 3 eta 4 mailetan Ingelesa eta Gizartea arloetan.

Liburu digital hauek paperezkoak eskaintzen dituen aukera guztiak bermatzeaz gain, propioak dituen abantailak irakasle eta ikasleen eskura jartzen dituzte (bideo, audio, zuzenketa automatiko, fitxa partekatuak, erabilera zehatzetarako aplikazioak…).

Azken urte hauetako liburu digitalaren erabilerak argi utzi du, eredu jasangarria izateaz gain, ikaste-prozesuan duen onura pedagogikoa, ikasleak bere konpetentzia digitala garatzeko euskarri garrantzitsua baita.

Ikasleek dokumentalak egiteko prozedurak pausoz pauso landu ondoren beraiena grabatzen dute ingelesa erabiliz. Proiektu honen baitan hainbat gai aztertzen dira, hala nola, aldaketa klimatikoa, migrazioa edo historia.  Gainera, elkartruke proiektu bat da, zeinetan dokumentalak atzerriko eskola bateko ikasleekin partekatu eta landutako gaien inguruan hitz egiten eta eztabaidatzen den, hainbat iritzi alderatuz.

Proiektu honek gure ikasleak urteetan lantzen aritu diren ingelesa bizitza errealeko testuinguruetan erabiltzea du helburu. Atzerriko eskola bateko ikasleekin kidetzen dira eta ingelesa erabiliz harremanetan jartzen dira. Posta elektronikoa, posta arrunta, bideo nahiz bideo dei bitartez komunikatzen dira, elkar ezagutu eta bata bestearen kulturaren berri emanez. Atzerriko hizkuntzaren erabilgarritasunaz eta kulturartekotasunaren balioaz jabetzea lortu nahi dugu. 

Hedatze proiektuaren helburu orokorrak bat datoz bete-betean Haztegi Ikastolak 2028rako garatze bidean duen proiektu orokorrarekin. Honako hau gure ikastolaren misioa: “Heziketa emozionala ardatz izanik euskaratik aniztasuna sustatu eta balioan jarriko duen proiektua garatzea, ikasle kritiko eta aktiboak sortuz.”

Beraz, hori kontuan izanda, hauek izango dira Haztegi ikastolako Hedatze proiektuaren helburu orokorrak:

• Haztegi Ikastolaren autonomia ardatz, hezkuntzaren kalitatea hobetzea. Dagokion etapan ikusten diren beharrei erantzuna emango dieten tailerrak eta errefortzu saioak eskainiz. 

• Ikastolak duen Hezkidetza planarekin bat parekidetasuna sustatuko duten tailerrak eskaintzea. Aniztasuna ardatz hartuta, ezberdintasunaren balioak bultzatuko ditu bizitzako arlo guztietan eta ikasle guztientzako aberasgarriak izan daitezkeen aukerak eskainiko ditu. 

• Ahozko eta idatziko konpetentziak eta irakurtzeko konpetentzia garatu eta indartzea, horretarako beharrezkoak diren ekintza eta baliabideak sustatuz.

• Euskararen erabilera bultzatzea. Mundu mailako migrazio garai hauetan euskararen ezagutza indartzeaz gain, euskaraz bizitzearen balioak ere indartu nahi ditugu.

ERABAKIAK HARTZEKO UNEA - INFORMAZIOA

DBH4ra iristean erabakiak hartzeko momentua da. Horregatik gure ikasle eta familiei laguntzeko asmoz, ibilbide akademikoan edukiko dituzten bide eta aukera desberdinetarako orientatzeko informazioa bildu dugu.

Helburuak:

• DBH eta DBHOko ikasturte amaieran, ikasleei ikaste-ibilbidean edukiko dituzten aukeren inguruko aholkuak ematea.

• Ikasle eta familientzako lagungarri izatea, bereziki norbanakoaren garapen pertsonalean  eta arlo akademikoei buruzko gaietan, hezkuntza-etapen arteko trantsizioan eta hezkuntza- ibilbidea hautatzekoan.

Ondorengo orrietan aukeraketa horiek modu errazago batean egiten lagunduko dizuen baliabide sorta duzue. Ate ugari irekiko zaizkizue: hauek aztertu eta hausnartu  eta beldurrik gabe galdetu. Zeuen buruak dantzan jartzeko ordua da!

INFORMAZIOA ESKURAGARRI